ЌЕ СЕКНЕ ДАНОКОТ ОД ОБЛОЖУВАЛНИЦИТЕ - класичните не работат, интернет игрите уште ги нема

Добивај вести на Viber

Лани граѓаните на земјава дале вкупно 200 милиони евра за да уплатат ливче во некоја од спортските обложувалници во земјава.

Но, оваа година тој износ сигурно ќе биде помал, бидејќи обложувалниците веќе не работат два месеци, а не се знае ниту кога ќе бидат отворени.

Граѓаните лани просечно по тикет уплаќале по околу 200 денари. Ова значи дека имало многу што уплаќале ливче од по 50 денари, но и такви што „ставале“ поголеми суми.

Додека, пак, лани обложувалниците во вид на добивки им исплатиле на играчите сума од 150 милиони евра. Или во превод, кај обложувалниците останале како „ќар“ 50 милиони евра.

Лани во спортските обложувалници биле уплатени голем број ливчиња, или 62,7 милиони тикети, говорат официјалните податоци на УЈП.

Државата, пак, од данок од приредувачите на игри на среќа во 2019 година се офајдила со околу 24 милиони евра, потврдуваат од УЈП.

Она што изненадува, е што во 2017 година на пример, обложувалниците по основ на задржан персонален данок на доход од исплатени добивки спрема играчите платиле износ од 38,8 милиони евра. Или, во 2019 година наплатениот данок во однос на 2017 е помал за 15 милиони евра. Зошто е така, не е јасно. Неодамна министерката за финансии Нина Ангеловска изјави дека годишно оваа индустрија му носи на државниот буџет по 30 до 40 милиони евра.

Оваа година, пак, државата сигурно ќе наплати уште помала сума од игрите на среќа, со оглед што од 15 март обложувалниците и казината престанаа да работат, а сега, иако оттогаш се поминати речиси два месеци, тие се уште не се отворени и не се знае кога тоа ќе се случи. Интернет игрите на среќа, како што велат од УЈП, се уште не се организираат. Затоа не се знае колку пари оваа дејност годинава ќе донесе во буџетот, но таа сигурно ќе биде многу помала во споредба со остварените приходи од лани.