Коцијанчич ја повика Владата да обезбеди услови за слободни избори
Објавено во: Македонија 03 Октомври, 2017
Портпаролката на Еврокомисијата, Маја Коцијанчич побара од актуелната македонска Влада и сите институции да обезбедат услови за слободни избори.
„Пред локалните избори во земјата, ние ги охрабруваме сите претставници на политички партии да постапуваат одговорно. Исто така, ги повикуваме сите институции да обезбедат услови за веродостоен и транспарентен изборен процес, што ќе им овозможи на сите граѓани слободно да ги остваруваат нивните демократски права“ - порача Коцијанчич.
Брисел инсистира и на одржување фер и демократски локални избори, на кои сите учесници ќе имаат услови за фер изборен натпревар на кој граѓаните слободно и без притисоци ќе го дадат својот глас.
Откако почна кампањата имаше повеќе искршени штабови од различни партии, а нападнат беше и кандидатот за градоначалник во Шуто Оризари, Елвис Бајрам.