Која е вистината за јавниот долг
Објавено во: Финансии 25 Декември, 2019
Расте јавниот долг на земјава. Заклучно со деветте месеци од годинава, тој е на ниво од 5,405 милијарди евра, што како апсолутен износ, е највисоко ниво досега во државава.
Или, како што говорат бројките на Министерството за финансии, за три месеци јавниот долг е зголемен за 100 милиони евра, додека во однос на крајот на минатата година, порастот е за 200 милиони евра.
Како процент од БДП, јавниот долг е 47,7 отсто, што е пораст за еден процентен поен во однос на претходниот квартал. А во однос на минатата година, пак, ако се гледа како процент од бруто домашниот производ, излегува дека јавниот долг се намалил, со оглед што на крајот на годината бил 48,6 отсто.
Опозицијата често критикува дека оваа власт го зголемува задолжувањето на земјава, на што тие одговараат дека долгот е стабилизиран во однос на претходниот период.