Колку од камати секојдневно заработува „Стопанска банка Скопје“?
Објавено во: Економија 23 Август, 2017
Десет милиони денари дневно од камати заработува најголемата деловна банка во земјава, покажуваат официјалните податоци од кои се гледа дека „Стопанска банка Скопје“ и годинава, традиционално, книжи рекордна добивка во изминативе пет години
„Стопанска банка Скопје“ успева да го одржи трендот на раст на добивката, покажуваат официјалните податоци од полугодишниот биланс на оваа банка објавени деновиве на Македонската берза за хартии од вредност.
За половина година добивката по акција на таа банка изнесува 75 денари однос 1,3 милијарди денари (21,2 милиони евра) што е за 7 отсто подобар резултат од првото полугодие лани.
Во периодот јануари-јуни банката остварила вкупни приходи од камати во износ од 2,23 милијарди денари и тие се само за 3 милиони денари пониски од истиот период 2016 година. При такви приходи од камата кратејќи ги расходите од камати за 79 милиони денари во однос на лани и сведувајќи ги на 389 милиони денари банката доаѓа до нето приход од камати од 1,83 милијарди денари што е за 66 милиони денари подобро од првото полугодие лани и тука бележи раст од 3,75 отсто. Кај приходите од провизии и надоместоци значајно е тоа што тие се зголемени за 18 милиони денари во споредба со истиот период лани и изнесуваат 477,2 милиони денари.
На расходната страна на билансот значајно е да се истакне дека пораснале резервациите за кредити во споредба со лани. Тие за првото полугодие изнесуваат 301,8 милиони денари, а во споредба со истиот период лани се зголемени за 36 милиони денари.
Депозитите растат за 10,4 отсто, кредитирањето минимално намалено!
Од билансот на состојба видливо е дека депозитите пораснале за 10,4 отсто во споредба со истиот период лани. Тие надминаа ниво од 69 милијарди денари и се поголеми за 710 милиони денари. Во овој период забележливо е намалување на кредитирањето на банката, но во минимален износ во споредба со истиот период лани. Тоа изнесува 58,39 милијарди денари и во однос на истиот период лани е помало за 260 милиони денари.
Р.Ф.