Љупчо Јаневски не го прифаќа повикот за оставка како директор на АППТ
Објавено во: Економија 20 Ноември, 2020
Љупчо Јаневски, директорот на Агенцијата за промоција и поддршка на туризмот, не го прифаќа повикот за оставка од Здружението на угостителството и туризмот при Стопанската комора на Македонија, Туристичко-угостителската комора на Македонија во рамки на Сoјузот на стопански комори и Националната асоцијација за дојдовен туризам, кои побараа тој да си замине поради некооперативност.
- Со здруженијата, асоцијациите и коморите работиме заеднички на донесување на сите можни мерки, предложени од нивна страна за ублажување на кризата. Сите четири сегменти и сетови мерки беа донесени по барање на коморите. Покрај соработката и отвореноста, АППТ секогаш работи со аргументи, статистики и постигнувања, изјави денеска директорот на АППТ.
Јаневски вели дека Агенцијата прва во регионот создаде Координативно тело, на нејзино барање, во кое учествуваат и членуваат сите засегнати страни од труизмот. и дека во најбрзо можно време од Комисијата за заразни болести и од Министерството за здравство ќе побара да донесе посебни протоколи кои ќе овозможат отворање на домашните ски – центри.
Иако досега се искористени само 43.000 ваучери за домашен туризам, тој смета дека ваквата поддршка дава резултати и треба да продолжи догодина, а треба и да продолжи и рокот за ваучерите кои не се искористија.Кај бројот на домашните туристи поголемиот пад е регистриран од март до јуни во споредба со лани, додека во месеците Август и Септември има пораст од 8,9% и 33,9% споредбено со истиот период минатата 2019та година. Ноќевањата го следат истиот тренд, а порастот во Август и Септември се за 1,1% и 26% споредбено со лани истите месеци.
АППТ за 2020 имаше одобрен буџет од 153.514.000 денари, но по ребалансот за сите предвидени проекти и активности, сумата е сведена на 94.992.000 денари.