Македонија се задолжува со еврообрзница

Добивај вести на Viber

Македонија ќе се задолжува со еврообврзница, одлучила Владата на вчерашната седница на која е усвоен и ребалансот на буџетот. Максималниот износ на еврообврзницата која е утврден со одлуката е 800 милиони евра, пари со кои ќе се обезбеди буџетска поддршка за годинава и за следната 2021 година. 

„Имајќи ги предвид сите предизвици кои произлегоа по прогласената пандемија на КОВИД-19 на светско ниво од страна на Светската здравствена организација, мерките за заштита и рестрикција на движење кои ги преземаат државите, а особено нејзиното влијание на пазарите на капитал, Министерството за финансии предложи, а Владата прифати, финансирањето со издавање на еврообврзници, кои ќе ја поддржат ликвидноста на државата во време на пандемија, намалената економска активност, преземените мерки за заштита на економијата и работните места на граѓаните, како и зголемените трошоци во секторот здравство, стои во соопштението од Влада. 

Оттаму велат и дека усвоиле информација за назначување агент за процесни услуги на Република Северна Македонија претставувана од Министерството за финансии во процесот на издавање на еврообврзница на меѓународниот пазар на капитал и го задолжиле Министерството за надворешни работи преку Амбасадата на Република Северна Македонија во Лондон, Велика Британија да ја преземе функцијата на агент за процесни услуги во име на Република Северна Македонија претставувана од Министерството за финансии.