МЕНУВАЧНИЦИТЕ, АКО ИМ СНЕМА ЕВРА, ЌЕ МОЖАТ ДА КУПУВААТ ОД БАНКИТЕ - НБМ со уште еден заштитетн механизам

Добивај вести на Viber

За да се заштити јавноста од ширење непотребна вознемиреност во однос на можноста за купување ефективни странски пари - евра, покрај засилената супервизорска контрола на менувачниците, Народната банка воведува уште еден дополнителен заштитен механизам на менувачкиот пазар. 

„Имено, со измени и дополнувања на Одлуката за менувачки работи, усвоени од Советот на Народната банка, се овозможува овластените менувачници, при евентуален недостиг на ефективни странски пари - евра, да се снабдуваат од банките, преку склучување договор со банката“, се вели во соопштението од НБМ. 

Сепак, оттаму нагласуваат дека според последните расположливи податоци, менувачниците располагаат со девизи. 

„Покрај тоа, за да се спречат какви било шпекулации околу девизниот курс, се воспоставува лимит до коj може тој да се движи, водејќи се од курсот по кој менувачниците ги купиле еврата од банките. Со тоа се обезбедува заштита на граѓаните и во однос на цената по којашто ќе може да купат евра од менувачница, доколку имаат потреба“, потенцираат од централната банка. 

Сепак, оттаму уште еднаш истакнуваат дека со купување евра граѓаните непотребно се изложуваат на трошоци. 

„Курсот на денарот е стабилен и ќе биде стабилен, за што гарантира Народната банка. Девизните резерви се на стабилно и високо ниво од 3,5 милијарди евра. За оние кои сакаат да купат девизи, девизи на пазарот има“, децидна е монетраната власт.

Велат дека ова е превентивна мерка, којашто се носи со цел да се направи уште еден заштитен слој на менувачкиот пазар, а во контекст на шпекулациите коишто станаа актуелни по почетокот на руско-украинската криза. Таа се презема за да се избегнат фиктивните притисоци на менувачкиот пазаркај овластените менувачи.