Мицкоски го започна мандатот од струмичка црква
Објавено во: Македонија 24 Декември, 2017
Христијан Мицкоски мандатот како претседател на ВМРО-ДПМНЕ го започна од верски храм во Струмица, каде што се поклони пред иконата на Света Богородица брзопослушница која беше донесена минатата година од Света Гора. Иконата досега ја посетиле илјадници верници од регинот.
„Чудо, да бидеш за нас” доби Благослов новиот лидер на ВМРО-ДПМНЕ од струмичкиот свештеник при денешната посета на црквата „Свети Петнаесет Тивериополски маченици“.
Мицкоски испрати порака за помирување кое и е потребно на Република Македонија.
„Луѓето во текот на нивниот животен пат носат многу одлуки, дел од тие одлуки некогаш знаат да бидат и погрешни, најголемиот дел се исправни. Како луѓе и како христијани треба да научиме на простување да посочуваме на грешките и истите да ги разбираме, а оние кои што грешат треба да научат да извлечат поука од грешките и истите да не ги повторуваат. Како народ и како граѓани на оваа држава ни е потребно помирување, толеранција и разбирање за сите останати. Јас одлучив денеска да го почнам мандатот како Претседател од ВМРО-ДПМНЕ од оваа свето место и да се помолам пред иконата на Мајка Богородица – Брзопослушничка, да побарам спокој за себе и спокој за сите граѓани во Република Македонија“, рече Мицкоски.
Мицкоски како предводник на демохристијанска партија со ваквиот прв потег ќе се обиде да ги истакне традиционалните вредности на ВМРО-ДПМНЕ.