Могерини го чека Заев како премиер наместо Димитриев
Објавено во: Македонија 23 Мај, 2017
Зоран Заев уште не изгласан за нов премиер својата прва меѓународна посета во име на оваа државна функција ќе ја оствари набрзо откако во ЕУ ќе биде примен токму како политичар кој е определен за иден премиер на Македонија, наместо актуелниот технички премиер Емил Димитриев.
Портпаролката на Европската комисија, Маја Коцијанчич, за МИА потврди дека мандатарот за составување влада и претседател на СДСМ, Зоран Заев е поканет да ја претставува Македонија на утрешната неформална вечера на премиерите на шест балкански држави со Високата претставничка на ЕУ, Федерика Могерини во Брисел.
– Во однос на тоа кој ќе учествува од БЈР Македонија на оваа вечера, потврдуваме дека Зоран Заев доаѓа како „определен за премиер“, рече Коцијанчич во изјава за дописникот на МИА.
Покрај премиерите на Србија, Александар Вучиќ, на Црна Гора, Душко Марковиќ, Еди Рама на Албанија, Иса Мустафа на Косово и Дениз Звиздиќ Босна и Херцеговина, Зоран Заев ќе ја претставува Република Македонија на утрешната неформална вечера што ќе се одржи во зградата на ЕЕАС во Брисел.
Иако, од кабинетот на Високата претставничка на ЕУ претходно соопштија дека поканите се испратени до актуелните премиери, сепак, во случајот со Зоран Заев и Македонија, Могерини одлучила да направи отстапка и се уште неизбран на функцијата македонски премиер, сепак да го покани него и да го претстави пред останатите лидери од Западниот Балкан.