Муквеге и Мурад „им ја зедоа“ Нобеловата награда за мир на Заев и Ципрас
Објавено во: Свет 05 Октомври, 2018
Добитници на Нобеловата награда за мир во 2018 година се Денис Муквеге и Надија Мурад, активисти за борба против сексуалното насилство во војна и оружени конфликти, со што дефинитивно лауреати нема да бидат македонскиот и грчкиот премиер Зоран Заев и Алексис Ципрас по изнаоѓањето на можно решение за деценискиот спор со името.
Номинациите на повеќе од 300 можни лауреати беа држени во тајност до самиот крај, а претходно уредникот на изданието рече дека Заев и Ципрас се меѓу кандидатите во оваа категорија.
Муквеге, гинеколог од Конго, беше номиниран неколкупати, додека младата активистка Надија Мурад, поранешна сексуална робинка на Исламска држава, веќе ја доби наградата Сахаров.
Комисијата рече дека докторот од Конго Денис Муквеге е „најистакнатиот, најобединувачки симбол на национално и на меѓународно ниво за борба против сексуалното насилство во војна и оружен конфликт“.
Мурад, пак, член на Јазиди-заедницата во Ирак, беше заробена од ИСИС и постојано силувана и подложувана на други малтретирања. Комисијата рече дека таа покажала „невообичаена храброст во раскажувањето на сопственото страдање“.
Во поголемиот дел од својот живот Муквеге им помага на жртвите на сексуално насилство во Демократска Република Конго. Заедно со неговите колеги истретирале илјадници жени кои биле жртви на сексуални напади, објави Нобеловиот комитет на Твитер.
Покрај тоа, тој покажал исклучителна храброст во своите јавни говори и осуди.
Лауреатите ќе ја примат наградата во вредност од девет милиони круни (870.000 евра). на 10-ти декември, на годишнината од смртта на Алфред Нобел.
Следниот понеделник ќе биде последната Нобелова награда за економија.