Над 100 ресторани за свадби аплицирале за неповратни грантови од државата
Објавено во: Економија 07 Декември, 2020
Крешник Бектеши, министерот за економија, не очекува да има промена на работното време на угостителските објекти за дочекот на Нова Година, иако вели тој, постојано прима предлози од угостителските комори да се зголеми работното време за празничната вечер.
- Работното време останува според препораките и мерките на Владата и според актуелните рестрикции. Она што можам да кажам е дека, согласно актуелната здравствена состојба, нема да има дополнителни рестрикции за работното време, а олеснувања може да има само ако процентуално се намали бројот на позитивни, рече Бектеши пред медиумите по средбата со претставникот на угостителите.
На повикот за помош во неповратни грантови кој се затвори на 4 декември аплицирале 1.000 ресторани за свадби, игротеки, туристички агенции, сместувачки објекти за поврат на такса и туристички водичи. Над 100 апликации од оваа бројка се поднесени од ресторани за свадби.
Со оглед на големата сума, Бектеши рече дека сите ќе ги добијат грантовите и дека нема да има потреба од принципот „Прв дојден, прв услужен“, а единствено само ќе треба субјектите да ги исполнуваат условите.