Највисоки пензии се воените, најниски земјоделските, но сите ќе растат
Објавено во: Финансии 12 Февруари, 2017
Најголем дел од луѓето во третото доба се корисници на пензија по основ на работно право, вкупно 304.464 граѓани. Уште 1.463 се корисници по основ на воено право, а 348 по земјоделско право.
Највисоки се воените пензии, во просек изнесуваат 20 илјади 769 денари. Најниски се исплатените пензии по основ на земјоделско право – само 6 илјади и 800 денари. Во јануари годинава, просечната пензија во Република Македонија изнесувала 13 илјади 721 денар. За споредба, просечната пензија во 2006 година изнесуваше 7 илјади 680 денари, што значи дека овој период се зголемила за цели 78,6 проценти.
- Ќе има редовно финансирање на платите на вработените во јавниот сектор, навремена и редовна исплата на пензиите, социјалните надоместоци и субвенциите во земјоделството“ – вели министерот за финансии Кирил Миноски.
Пензионерите од декември минатата година имаат повисоки пензии за околу 670 денари, како резултат на оствареното ветување за зголемување на пензиите за 5 проценти, реализирано линеарно кај сите пензионери. Владата и за годинава гарантира редовно префрлање на парите.