Нимиц очекува интезивни преговори за името до крајот на годината
Објавено во: Македонија 24 Септември, 2017
Македонија и Грција кон крајот на годината ќе го интензивираат преговарачкиот процес. Во интервју за новинската агенција ИБНА, медијаторот во спорот, Метју Нимиц потврдува дека за тоа постои интерес и кај двете страни, а најави и негови предлози во, како што рече, вистинско време.
„Односите се подобрија во последните месеци и очекувам поголема активност. Двете земји имаат свои позиции, може да ги наречете црвени или сини линии. Има многу важни прашања во двете земји, но мислам можат да се приближат“, вели Нимиц во интервјуто.
Додека Нимиц најавува интензивирање на преговорите и приближување на позициите, грчкиот шеф на дипломатијата Никос Коѕијас, пак по средбата со него порачал дека решението на спорот не се однесеува само на името на државата.
„Името и употреба на името – двете прашања кои се во надлежност на господинот Нимиц да преговара, како и издадените зборови, јазик, државјанство, за кои од грчка страна во соработка со универзитетски професори се подготвува листа за нивна регистрација, а последно се кратенките“, изјави Никос Коѕиас – министер за надворешни прашања на Грција.
Интензивирање на преговорите се очекува по завршување на локалните избори, а пред само неколку месеци медијаторот го опипуваше пулсот и на Скопје и на Атина, додека пак Димитров и Коѕиас работеа на како што самите порачуваа на мерките од доверба и демантираа дека и при посетата на Димитров во Атина, и на Коѕиас во Скопје, станало збор за спорот со името.