НОЖ В ГРБ ЗА ЗВРЛЕВСКИ: Обвинителот си заминува!

Добивај вести на Viber

Со осум гласа „за“ и еден против, Советот на јавни обвинители даде зелено светло за предлогот на Владата за разрешување на досегашниот Републички јавен обвинител Марко Зврлевски. Според процедурите, мислењето на Советот се враќа во Влада, а потоа влегува во Собрание, кое треба да закаже седница за разрешување. Ваквото мислење на Советот доаѓа само по неколку дена откако претседателот на Советот Петар Аневски изјави дека Зврлевски е перфектен јавен обвинител. Но вчера ретерираше, па наместо перфектен го употреби зборот добар. Образложи дека Зврлевски не можел да знае за секој обвинител што работи и да ги држи под контрола 

„Се изразив можеби многу во суперлатив за обвинителот, а инаку е добар обвинител. Тоа повторно ќе го кажам, секој го дели тоа мислење, мислам и мноинството членови на Советот, дека како обвинител е добар и нема нешто забелешка на неговата работа. Јавниот обвинител ви гарантирам не може точно да врши увид на тие 61 јавен обвинител како постапува во детали, сè да знае конкретно за предметите. А, тоа се однесува и за јавниот обвинител на Македонија, кој не може да држи се под контрола во сите јавни обвинителства“, изјави Аневски.

Засега не е познато на која од следните собраниски седници пратениците ќе распрваат за разрешувањето на Зврлевски, за што е потребно просто мнозинство до 61 глас. Ако пратениците изгласаат разрешување, до избор на нов државен обвинител, в.д обвинител ќе биде Џелал Бајрами, кадар на ДУИ кој беше ек-министер за труд и социјална политика. Доколку се изгласа разрешувањето, се распишува конкурс за нов државен обвинител, кој трае  5 дена. По завршувањето на конкурсот, Советот има право два пати по 15 дена за да даде позитивно или негативно мислење за кандидатите, а доколку не се произнесе тогаш  ќе се смета дека мислењето е позитивно. Но ако Советот не даде позитивно мислење за ниту еден од пријавените кандидати во тој случај огласот се повторува.  

Веднаш по изборот на Владата, премиерот Зоран Заев го повика јавниот обвинител Марко Зврлевски, да си даде оставка. Но тоа се случи, поради што на владина седница се иницираше постапка за негово разрешување. Во образложението беше наведено дека Зврлевски  незаконско и ненавремено ја извршувал функцијата. Премиерот Заев порача дека реформите се приоритет на новата влада, а еден од симболите за узурпирана правна држава е Марко Зврлевски. Заев најави и реизбор на судиите следејки ја европската пракса и очекува дека никој барем јавно нема да се спротистави на градење на независно правосудство.

Зврлевски функцијата републички јавен обвинител ја извршуваше четири години. На оваа позиција дојде од скопското јавно обвинителство наследувајќи го дотогашниот обвинител Љупчо Шврговски. Беше единствен кандидат на огласот, а Собранието го изгласа на 21 Јануари 2013 година, во вечерните часови со 58 гласови “за“ и ниту еден против или воздржан. Зврлевски важи за близок човек на претходната владејачка структура предводена од ВМРО ДПМНЕ. На свечената заклетва Зврлевски се обврза дека ќе пристапува непристрасно и дека ќе ги почитува сите принципи и правила. 

“Пред претседателот на Собранието на Република Македонија дадов свечена изјава, заклетва дека при вршењето на функцијата јавен обвинител ќе постапувам само согласно Уставот, законот и ратификуваните договори и дека притоа ќе постапувам непристрасно, совесно и стручно“, изјави тогаш назначениот нов државен обвинител  Марко Зврлески.

Но во овие четири година крупни предмети кои стигнаа  со обвиненија за корупција, доден денес останаа без разрешница. За случајот со “Македонска банка“, за кој се појави аудио снимка според која  опозицијата го обвини тогашниот  премиер  Никола Груевски дека земал кеш пари од контроверзниот српски бизнисмен Јовица Стефановиќ – Нини, Зврлевски оцени дека нема основ за покренување на постапка за случајот.За аферата „Актор“ пред три години, за кој а тогашната опозициска СДСМ тврдеше дека преку фирмата која го гради патот Демиркапија – Смоквица се изнесувале милионски суми во кеш, од обвинителството изјавија дека го следат случајот, но не се преземаа никакви дејства. Случајот сеуште нема разрешница, иако европскиот суд ОЛАФ веќе почна истрага. Обвинителството на  Зврлевски покрена обвинителен акт по обелоденувањето на политичките “бомби“, за кои СДСМ тврдеше дека високи функционери на тогашната владејачка стрѕктура предводена од ВМРО ДПМНЕ е вмешана во сериозни криминали и корупција.  Паралелно токму од прислушуваните разговори Специјалното јавно обвинителство отвори низа предмети и истраги за фунционерите на ВМРО ДПМНЕ. Но од друга страна обвинителството на Зврлевски врз основа на објавени прислушувани видео материјали од премиерскиот кабинет,  го отвори случајот “Поткуп“ во  кој Зоран Заев седна на  обвинителна клупа.

Обвинителството на Зврлевски се вклучи во истргата за „крвавиот четврток“, кога демонстрантите од иницијативата „За заедничка Македонија“, влегоа во Собранието и тепаа пратеници и новинари. Дел од напаѓачите и учесниците добија  условни казни за „учество во толпа која ќе спречи службено лице во извршување службена должност”, но нема информација  од ОЈО дали ќе покрене некакви дејства или истрага за тоа  дали водачите на иницијативата „За заедничка Македонија“ имаат вина на насилствата во Собранието.

Т.С