Организацијата на работодавачи на Македонија одбележа 10 години постоење
Објавено во: Економија, Стил 10 Декември, 2015
На конференцијата организирана по повод 10-годишниот јубилеј на Организацијата на работодавачи на Македонија (ОРМ), беше реафирмирана определбата на ОРМ да биде активен чинител во креирањето на економско-социјалната политика во земјата, преку нејзиното учество и давањето реален придонес во работата на Националниот економско-социјален совет, но и преку самностојно дејствување за теми кои се во интерес на работодавачите и бизнисот во целина.
„Како најголема и единствена репрезентативна организација на работодавачите во земјава, Организацијата на работодавачи на Македонија, како и во изминатите 10 години, така и во иднина, ќе продолжи посветено и енергично да ги промовира и застапува интересите на своите членки во општеството, особено преку социјалниот дијалог со Владата и синдикатите“, истакна претседателот на ОРМ, Ангел Димитров.
Toj нагласи дека oрганизацијата останува отворена за соработка со институциите, синдикатите, академската заедница и граѓанското општество во изнаоѓање ефикасни решенија и креирање развојни политики кои ќе овозможат раст на бизнисот и домашната економија, нови работни места и перспектива за младите, како и социјална сигурност за сите граѓани.
Во рамки на одбележувањето на 10-годишнината на ОРМ беа доделени и дваесетина благодарници за особен придонес и исклучителни залагања во работата и успехот на организацијата, а беше организирана и дебата на тема „Учество на државата во економскиот систем на Република Македонија“.
Во Организацијата на работодавачи на Македонија членуваат над 1000 компании од 15 сектори со повеќе од 70 000 вработени. ОРМ е единствената репрезентативна организација на работодавачи од приватниот сектор која, заедно со Владата и синдикатите, го сочинува Економско-социјалниот совет, како трипартитно тело за социјално договарање и креирање политики.