Османи: Уште во 2019 година е решено заедничкото чествување на Цар Самоил
Објавено во: Македонија 03 Април, 2022
Уште во 2019 година е решено заедничкото чествување на Цар Самоил, Кирил и Методиј, Климент Охридски, изјави шефот на дипломатијата, Бујар Османи.
Министерот вели дека се потребни почести средби на македонско-бугарската Комисија.
„Во 2019 година е решено прашањето за заедничко чествување на Цар Самоил, Кирил и Методиј, Климент Охридски. Овие договори не се објавени, бидејќи чекавме во овој процес на заокружување на политичките прашања да најдеме начин кога и како ќе се објават текстовите, но членовите на Историската комисија од наша страна стојат во одбрана на тоа што го потпишале и го одобриле како текст. Во моментов се зборува дали тие содржини ќе се препорачаат на училиштата за учебниците и сепак оставам Комисијата да ги објасни тие детали“, додаде Османи.
Бугарскиот историчар Ангел Димитров деновиве изјави дека темата за Цар Самоил е завршена работа.
Османи на денешниот брифинг со новинарите изјави дека лица вработени во македонски институции минатата недела се јавувале во Бугарија со цел да не се реши спорот меѓу двете земји.