ОСТАР ПАД НА WALL STREET - пазарот се надеваше на „црвен бран“ во САД, но не го доби
Објавено во: Финансии 10 Ноември, 2022
На Волстрит цените на акциите вчера остро паднаа, по три дена раст, бидејќи апетитот за ризик на инвеститорите се намали додека ги очекуваа резултатите од конгресните избори и извештајот за инфлацијата во САД.
Dow Jones се лизна за 1,95 отсто, на 32.513 поени, додека S&P 500 потона за 2,08 отсто, на 3.748 поени, а индексот Nasdaq 2,48 отсто, на 10.353 поени. Откако скокна за околу 3 отсто во претходните три дена, S&P 500 изгуби добар дел од тие добивки вчера.
Последица на резултатите од американските избори
Тоа е резултат на неизвесна конгресна трка. Конечните резултати се уште не се познати, но засега е јасно дека демократите освоија повеќе, а републиканците помалку пратенички места од очекуваното, па отсуствуваше „црвениот бран“ републиканци, наречен така по бојата на нивната партија.
Пазарот се надеваше дека републиканците ќе освојат мнозинство во Претставничкиот дом, но и во Сенатот, бидејќи контролата на само еден дом на Конгресот ќе им даде моќ на републиканците да ја запрат законодавната агенда на претседателот Џо Бајден, што ќе одговара на пазарот на капитал во некои сегменти.
Победата на демократите, од друга страна, би предизвикала стравувања за дополнително регулирање на технолошкиот сектор, зголемување на даноците и зголемени буџетски трошоци, што може дополнително да ги зајакне инфлаторните притисоци.
„Многумина се надеваа на црвен бран“
„Многумина на пазарот се надеваа на „црвен бран“. Мислам дека сме во единствена ситуација каде што поголема победа на републиканците би била подобра за пазарот. Барем во некои сектори, како што се одбраната и енергијата, цените на акциите значително би пораснале“, објаснува Џеј Хетфилд, директор во Инфраструктурен капитал менаџмент.