ПЕРСОНАЛЕЦОТ ЌЕ ДОНЕСЕ ПЛУС 63 МИЛИОНИ ЕВРА, А ГОЛЕМИ ПАРИ ЌЕ ДОЈДАТ И ОД ДДВ - власта го објави Буџетот за 2023 година, еве кои се клучните поенти

Добивај вести на Viber

На веб страницата на Собранието е објавен Буџетот за идната година.

Пратениците имаат 20 дена да го прочитаат и да почнат да го чешлаат овој најважен економски документ во државата, прво на матичната Собраниска комисија за финансирање и буџет. 

Што може да се забележи од првичниот поглед на државната каса која власта ја скрои за идната година?

Од бројките може да се види дека вкупните приходи ќе бидат на ниво од 4,6 милијарди евра, што е раст за 590 милиони евра во однос на ребалансираниот буџет. 

Ако го погледнеме данокот на личен доход, што е всушност персоналецот, може да се види дека власта таму планира значаен пораст.

Или, од данок на личен доход в година треба да се соберат 431 милиони евра, наспроти 368 милиони евра колку што се предвидени за годинава и тоа со ребалансираниот буџет, што значи дека планиран е раст од над 17 проценти, или зголемување за 63 милиони евра.

Според познавачите, тоа упатуива дека власта е поблиску до воведување на прогресивен данок, иако според неа, во првите шест месеци од идната година тоа нема да се случи.

Од најголемиот полнач на државната каса, ДДВ, ќе се соберат 1,28 милијарди евра, што во однос на ребалансот е раст за 14,7 отсто или за 164 милиони евра. Ова, според експертите, и од причина што се планира висока инфлација, па и таа е вкалкулирана во ДДВ-то. 

На страната на придонесите, пак, исто така е предвиден голем раст, и тоа за цели 154 милиони евра, што според познавачирте, се должи на порастот на минималната плата. 

Или, критичарите велат дека даночната реформа, која, според нив, сепак ќе ја има, како и инфлацијата, ќе го полни државниот буџет. 

Кога станува збор за расходната страна, може да се забележи дека власта, и покрај кризата, не планира да штеди на плати на своите функционери и вработени, па така тие ќе изнесуваат 567 милиони евра или тоа е зголемување за 27 милиони евра во однос на ребалансот на буџетот кога тие тежеле 540 милиони евра.

На страната на расходите може да се забележи и голем пораст на трансферите. 

Н.Н.Ф.