Пет лица идентификувани и повикани во полиција поради нападот на Елвис Бајрам
Објавено во: Македонија 03 Октомври, 2017
Пет лица се повикани на разговор во полиција поради учество во тепачката во која беше повреден кандидатот за градоначалник на Шуто Оризари, Елвис Бајрам, син на Амди Бајрам.
Кандидатот е нападнат вчера попладне со секири и метални прачки, по што со тешки повреди на главата е префрлен во Градската општа болница „8 Септември“.
„Министерството за внатрешни работи информира дека веднаш по добиената пријава за нарушување на јавниот ред и мир, преземени се мерки за расчистување на кривично-правниот настан. Идентификувани се и повикани на разговор пет лица кои учествувале во тепачката и во постапка е прибирањето докази за понатамошно постапување“- информираат од полицијата.
Министерството за внатрешни работи најостро ги осудува сите облици на насилство, а особено во текот на изборната кампања.