Промените на породилното отсуство се искомплицираа, но се уште се возможни
Објавено во: Македонија 10 Јуни, 2017
Граѓанската инцијатива за промена на законот за работни односи во делот на породилното отсуство не беше прифатена од мнозинството во собраниската комисија поради низа правни недостатоци, но дебатата за промените и натаму е активна иако се претвори во меѓусебна битка на ВМРО-ДПМНЕ и СДСМ.
Пратеничката Нола Исмајлоска Старова од ВМРО-ДПМНЕ вчера најави дека заедно со пратеничката Магдалена Манаскова ќе поднесат измени на Законот за работни односи кои се однесуваат на продолжување на породолното отсуство за идните мајки.
– Сакам да нагласам дека поднесуваме идентичен закон со граѓанската иницијатива која што беше поднесена и потпишана од 217 мајки до Собранието на Република Македонија и истата како неуредна, беше одбиена на Комисијата за политички систем од страна на мнозинството предводено од СДСМ. Нашата цел не е да ја превземеме граѓанската иницијатива, туку преку овие законски измени да ја забрзаме постапката и да им помогнеме на мајките кои што одново треба да ја повторуваат целата постапка која што ќе трае подолго време и повторно да ја поднесат иницијативата до Собранието на Република Македонија, рече Исмајлоска.
СДСМ излезе со став дека тие ќе бидат на страната на мајките работнички и ќе донесат низа законски измени со кои ќе им ја подобрат состојбата, додека пак ВМРО-ДПМНЕ имале шанси тоа да го сторат изминатите 11 години и не успеале. Сега борбата за продолжување на породилното отсуство што е значајно за многу родители прерасна во политичка и исходот е нејасен.