Протестите против мерките за штедење предизвикаа судири

Добивај вести на Viber

Десетици луѓе се повредени, а над 150 уапсени во судирите меѓу полицијата и демонстрантите во Шпанија, Португалија и Италија, на протестните собири организирани вчера ширум Европа поради мерките за штедење и невработеноста.

Незадоволството на работниците се премина во насилство кога полицијата се судри со демонстрантрите во Мадрид и во други шпански градови, при што е користен и солзавец.

До синоќа, кога на улиците на Мадрид излегле десетици илјади демонстранти, 118 лица се уапсени, додека 74 лица, меѓу кои 43 полицајци се повредени.

Меѓу уапсените се две лица кај кои е пронајден материјал за правење експлозив. Во центарот на Мадрид полицијата во еден судир со демонстрантите употреби и гумени куршуми, а повеќе излози се искршени.

Протестите прераснаа во насилство и во Италија, каде десетици илјади студенти и работници во повеќе градови се судрија со полицијата.

Судири имаше и во Португалија, каде полицијата употребила пендреци за да ги растера демонстрантите пред Парламентот во Лисабон, при што се повредени пет лица, од кои едно потешко. Демонстрантите ја гаѓале полицијата со камења повеќе од еден час, а потоа полицајците возвратиле и ги растерале демонстрантите.

Помирни демонстрации се одржани во Белгија, Франција и Грција. Мирни протести со помал број учесници имало и во Германија, Холандија и Данска.

На масовни протести повика Европската конфедерација на синдикати, која остро се противи на мерките на штедење и смета дека тие ја туркаат Европа длабоко во економска стагнација и го уриваат европскиот социјален модел.