Пукна брана која уништи домови и усмрти луѓе
Објавено во: Свет 03 Јули, 2019
Пукна брана во Индија, при што шест луѓе загинаа.
Обилните монсунски дождови предизвикаа пукање на мала брана во западниот дел на Индија. Оштетени се десетици домови, а 18 лица се водат за исчезнати.
Рушењето на браната Тиваре е во областа Ратнагири, на околу 275 километри од Мумбаи.
Сезонските дождови предизвикаа голема штета и во индискиот финансиски центар Мумбаи, прекинувајќи го железничкиот и воздушниот сообраќај во 18-милионскиот град, а рушењето ѕидови уби скоро 30 луѓе.
Властите побараа помош од Националните сили за одговор при катастрофи за побрзо пронаоѓање на исчезнатите.
Секоја сезона на монсуни, која трае од јуни до септември, Индија се соочува со фатални инциденти, рушење згради и ѕидови поради дождовите што ја ослабуваат и онака кревката структура на градбите.