Рама да се повлече од „мини Шенген“, бараат во Приштина

Добивај вести на Viber

Косовските партии бараат од Рама да го откаже самитот за „мини-Шенгенот”. 

Најголемите партии  од власта и од опозицијата, бараат од премиерот на Албанија Еди Рама да го откаже самитот на Албанија, Северна Македонија и Србија, што треба да се одржи во Драч, во рамките на инцијативата за создавањето на таканаречениот „мини-Шенген”,  јави дописникот на МИА од Приштина.

Меѓу причините поради кои косовските партии бараат од официјална Тирана да заземе „нов став кон Србија”, е негирањето на официјален Белград, на чело со српскиот претседател Александар Вучиќ, на злосторствата што српските воени, полициски и паравоени сили ги извршиле за време на војната во Косово во 1998-99 година, објави новинската агенција КосоваПрес.

Партиите победнички на октомвриските парламентарни избори, досега опозициските Движење Самоопределување (ВВ) и Демократскиот сојуз на Косово (ЛДК), како и оние кои ја изгубија власта и преминуваат во опозиција, Демократската партија на Косово (ПДК) и Алијансата за иднината на Косово (ААК), се едногласни во ставот дека не може да се разговара за регионална соработка со една држава која ги негира злосторствата што ги извршила во последните војни во регионот.

Претходно средби за „мини Шенген“ имаше во Нови Сад и Охрид. 

Косовскиот претседател Хашим Тачи се состана со Рама минатиот месец во Тирана на разговори околу идните случувања во меѓународните односи на Западен Балкан.