Рама најави суво пристаниште во Струга и нов граничен премин Поградец-Струга
Објавено во: Македонија 14 Ноември, 2022
Се договоривме за иницијативите на Груби за суво пристаниште во Струга и за нов граничен премин Поградец-Струга, вели албанскиот премиер Еди Рама.
Постигнат е договор на денешната заедничка седница на Владите на Македонија и Албанија што се одржа во Скопје.
„Проектот за суво пристаниште го земаме под наша одговорност преку холандска компанија, која го има проектирано новото комерцијално пристаниште, но и воена инфраструктура во Драч, како и сувото пристаниште во Приштина. На овој начин мислиме дека создаваме една комплексна инфраструктура во функција на зголемување на волуменот на интеракција на нашите држави што беше наш приоритет, но и приоритет на иницијативата Отворен Балкан и на Берлинскиот процес“, рече Рама.
Рама владината конференција ја оцени како многу продуктивна и рече дека на неа се финализирани 21 договор меѓу двете влади.Евроинтеграции, одбрана, безбедност, инфраструктура, енергетика, култура, борба против меѓународен криминал, железничко поврзување. Во овие сфери двете земји потпишаа договори и меморандуми.
И македонскиот премиер Димитар Ковачевски и Еди Рама порачаа дека ова е само потврда на новиот дух на соработка меѓу земјите од регионот и продолжување на унапредувањето на партнерството од иницијативата „Отворен Балкан“.
Но, и двајцата премиери беа јасни дека целта и за Скопје и за Тирана е членство во ЕУ – рокот за тоа е 2030 година.
Инаку, ова е втора владина седница меѓу Македонија и Албанија.
фото Фејсбук