СЕ ЈАВИЈА ОШТЕТЕНИТЕ ОД ЕУРОСТАНДАРД - политичките партии да не ја користат нашата мака за меѓусебни обвинувања

Добивај вести на Viber

Се јавија и оштетените штедачи од Еуростандард банка, по вчерашната срееба со премиерот Зоран Заев и вицепремиерот Фатмир Битиќи. 

Од Иницијативниот одбор на Здружението на  оштетени штедачи на Еуростандард банка велат дека на состанокот заедно ја разгледале ситуацијата, во која, како што нагласуваат, тие како штедачи се оштетени, и ги споделиле нивните барања за итно решавање на овој проблем со кој што се засегнати голем број на физички и правни лица.

„Воедно споделивме некои од проблемите со коишто се соочуваат и ќе се соочуваат оштетените граѓани, физички и правни лица, по пропаѓањето на Еуростандард банка, доколку не се реши нашиот проблем. Состанокот помина во конструктивна атмосфера и премиерот Заев не увери дека  сите предлози ќе бидат разгледани од страна на институциите и дека ќе се бара решение се со цел да не трпиме последици ние граѓаните и фирмите“, пишуваат штедачте во допис до јавноста. 

Иницијативниот одбор ја поздравува отвореноста на премиерот Заев и на Владата со цел изнаоѓање решение на овој проблем. 

Најавуваат и дека следните денови ќе побараат од сите парламентарни партии поддршка за решавање на овој  проблем, во кој велат, се инволвирани без нивна вина.

„Исто така ги повикуваме сите политичките партии и другите  релевантни субјекти да не поддржат во разрешување на нашиот проблем во најскоро можно време и да не ја користат нашата мака за меѓусебни обвинувања, туку напротив сите заедно да се ангажираат во изнаоѓање праведно решение за нас“, велат штедачите.

Ги замолуваат сите заинтересирани оштетени физички и правни лица кои досега не се имаат зачленето во Здружението да пратат апликација за членство во Здружението на оштетени штедачи на ЕСБ на следната емаил адреса:780stedaciesb@gmail.com и заедно сплотени да се фокусираат на изнаоѓање решение со кое никој нема да биде оштетен.