Се топи индустријата, а има и отпуштања - и во јули короната го зеде цехот

Добивај вести на Viber

Индустријата го плаќа цехот на корона кризата. Во јули индустриското производство паднало за 9,5 отсто, објави Државниот завод за статистика.

Во истиот месец, бројот на работниците во индустријата е намален за 6,2 проценти.

Гледано по сектори, индустриското производство во секторот Рударство и вадење на камен во јули 2020 година, во однос на јули 2019 година, бележи опаѓање од 36,1 отсто, во секторот Преработувачка индустрија бележи опаѓање од 6,5 отсто, а во секторот Снабдување со електрична енергија, гас, пареа и климатизација опаѓање од 2,6 отсто.

Според главните индустриски групи, производството во јули 2020 година, во однос на јули 2019 година, бележи опаѓање кај Енергија за 10,7 отсто, Интермедијарни производи, освен енергија за 9,1 отсто, Капитални производи за 17,4 отсто, Трајни производи за широка потрошувачка за 37,3 отсто и Нетрајни производи за широка потрошувачка за 0,6 отсто.

Во врска со бројот на работниците, пак, кај рударството во јули 2020 тие бележат опаѓање од 0,7 отсто, во секторот Преработувачка индустрија опаѓање од 6,9 отсто, а во секторот Снабдување со електрична енергија, гас, пареа и климатизација опаѓање од 0,9 отсто.

Според главните индустриски групи, бројот на работниците во индустријата во јули 2020 година, во однос на јули 2019 година, бележи опаѓање кај Енергија за 0,9 отсто, Интермедијарни производи, освен енергија за 5,4 отсто, Капитални производи за 10,9 отсто, Tрајни производи за широка потрошувачка за 7 отсто и Нетрајни производи за широка потрошувачка за 5,4 отсто.

Инаку, од јануари до јули годинава, гледано кумулативно, индустријата регистрирала опаѓање на бројот на вработени за 4,6 отсто во споредба со лани, а најголема причина за ова е падот на индустриското производство од 13,8 отсто во првите седум месеци од годинава.