Што ќе преземе градоначалникот Шилегов за загадувањето во Скопје?
Објавено во: Македонија 20 Ноември, 2017
Мерките против загадувањето на Скопје ќе бидат прв приоритет на новиот градоначалник на град Скопје Петре Шилегов кој по речиси четири недели откако ја презеде функцијата на Советот на градот Скопје ќе предложи повеќе решенија.
Се планира организирање акција за генерално чистење на градот и воведување бесплатен јавен превоз во деновите кога ќе има големо загадување на воздухот.
Предвидено е да се пренаменат осум милиони денари (130 илјади евра) од градскиот буџет за таа намена, како и да се измени програмата на јавното претпријатие „Комунална хигиена“ за што ќе биде потребна и поддршка од Советот, но таму мнозинство веќе обезбеди коалицијата предводена од СДСМ.
За да се организира акцијата ќе се ангажираат дополнителни 1.000 работници и тие ќе добијат надомест по 100 евра. „Генералката“ ќе трае 21 ден.
Советот исто така треба да донесе одлуки за да се воведат бесплатни автобуски линии од центарот на Скопје до Средно Водно и да се овозможи бесплатно паркирање во викенди на паркиралиштата близу до почетните станици на овие линии.
Со истата одлука се предвидува и градоначалникот да може да донесува решенија за бесплатен јавен превоз во деновите кога ќе има големо загадување на воздухот.