Што крие експлозивниот раст на „останати приходи“ на Комерцијална банка?

Добивај вести на Viber

Во најголема мерка благодарејќи на растот на овие приходи во периодот јули-септември банката успеала да ја зголеми нето добивката до солидни 526 милиони денари

Ставката „останати приходи од дејноста“ го крие клучот за „суперкварталната“ добивка на „Комерцијална банка“ која крајот на третиот квартал го книжи со добивка од солидни 526,2 милиони денари што е раст на ќарот за 325 милиони денари во споредба со крајот на јуни годинава.

Билансот на успех за третиот квартал на „Комерцијална банка“ покажува дека нето приходите од камати како најголема приходна ставка растат со очекувано просечно темпо  кое важи и за претходните два квартали. Нето приходот од камати на крај на септември е 2,32 милијарди денари што е над 770 милиони денари нето приход по квартал. Наспроти нив очекувано и во согласност со просечната квартална динамика расте и најголемата ставка на трошочната страна односно резервациите за кредитните пласмани. Тие на крај на третиот квартал изнесуваат 1,53 милијарди денари, а на крај на вториот квартал биле 1,08 милијарди денари. Растот е за околу половина милијарда денари што е сепка во рамки на просечен квартален раст на резервациите.

Продорот кон солидниот раст на профитот го прави „џокерот“ или , кажано со фудбалски израз „златната резерва“ , во случајот ставката останати приходи од дејноста. На крајот на септември годинава тој приход е 414 милиони денари, а во споредба со крајот на јуни пораснал за 213 милиони денари. Со други зборови банката од останати приходи за само еден квартал остварила повеќе пари одошо остварила во првите два квартали заедно. 

Тука секако е главниот генератор за толку силно изразениот раст на добивката на банката на крајот на септември. 

Мора да се истакне дека банката на крајот на септември годинава генерално има подобри приходи на нето основа и во споредба со истиот период лани. Така нето каматите пораснале за 15 милиони денари до износ од 2,32 милијарди, нето приходите од провизии и надоместоци паднале за 19 милиони денари, но останатите приходи на банката во споредба со првите девет месеци лани бележат раст за 220 милиони денари односно речиси 100 отсто повеќе во однос на лани. Нето добивката на крај на септември годинава е за 210 милиони денари повеќе од лани.

Р.Ф.