Синдикатот на АД Македонска пошта: Бараме итна средба со Заев, ни зависи егзистенцијата

Добивај вести на Viber

Синдикатот на АД Македонски пошта побара од премиерот Зоран Заев итна средба до идната недела со цел што е можно побргу да се пронајде деловна банка која ќе го одржува прометот на друштвото по стечајот на Еуростандард. Од таму велат дека поштата изминатиот период работи со сериозни загуби на дневна основа и дека страбуваат за своите плати и работни места.

„Сериозно е нарушено работењето, повеќе од 20 дена на дневна основа генерираме сериозни загуби со оневозможување на платниот промет на 300 поштенски единици. Прекинати се приходите од меѓународниот сообраќај и намалени оние  од внатрешниот сообраќај во изминатите шест месеци. 2.300 вработени стравуваат за своите плати и работни места. Тоа е директна закана за егзистенцијата и нивните семејства. а неработењето на поштенските филијали имаат и големо влијание на населените места и кај корисниците. Над 100.000 корисници се оштетени“, рече Боро Велигденов, претседателот на синдикатот, пред медиумите.

Тој додава дека состојбата може многу лесно да ескалира во финансиска криза доколку Владата не се зафати посериозно да го реши овој проблем.

„Владата има обврска да не постави како приоритет и да направи договор со друга банка за платен промет и да се заложи за стабилизација на претпријатието. Тоа е затоа што сопственик на АД Македонска пошта е Владата. Во моментов знеме дека има преговори со одредени банки, но нема имиња“, додаде Велигденов.