Слушнати барањата на родителите на деца со посебни потреби, и денес шатори пред Собрание
Објавено во: Македонија 20 Јуни, 2017
Родителите на децата со посебни потреби организирани во иницијативата „5 до 12“ повторно кампуваа пред Собранието на Република Македонија со цел да ги претстават нивните барања за поголеми права и развивање на нова стратегија од страна на државата. Се бара добивањето на средствата да не се ограничува до 26 годишна возраст, туку да биде доживотно. Родителите инсистираат и на дополнителни дневни центри за згрижување.
„Редно време е овие 120 пратеници, министри и бизнисмени, од сите општествени сектори да дојдат тука и да ги споделиме проблемите заедно, за тие да не останат само на хартија. Дојдете тука и видете кои сме и што сме“ – изјави Суарет Алиша од “5 до 12”.
На состанокот е договорено да биде формирана работна група од претставници на МТСП, на неформалната коалиција „5до 12“, на членови на Ресурсен центар, Советот на Национални организации, претставник на Координативното тело за изедначување на правата на лицата со попреченост, Хелсиншкиот Комитет, а како мониторинг на целиот процес ќе биде повикан и Народниот правобранител.
По извршените анализи внатре во Мионистерството за труд и социјaлна политика, предлози кои ќе бидат ставени на разгледување во работната група се следните: укинување на границата од 26 години за користење на правото за скратено работно време на родителите кои имаат деца со попреченост; ќе се разгледа воведениот материјален цензус за користење на правата на помош и нега, мобилност, слепило и глувост; ќе се разгледа можноста за поголема професионализација на првостепената комисија за нега и помош од друго лица, истата технички и кадровски да се доекипира, и истата да може да ги спроведува увидите во домот на корисникот. Исто така, Конзилијарните комисии од прв степен за ова право да бидат укинати за да се намалат административните процедури за оваа категорија на граѓани; ќе се преоценат програмите за работа на дневните центри за деца со попреченост на територија на Република Македонија. Од страна на МТСП веќе се побарани податоците од сите центри во државата, со поддршка на УНИЦЕФ. Изготвена е анализа за алтернативните форми на згрижување, и согласно со препораките и забелешките во наредниот период ќе се преземат соодветни чекори во насока на доекипирање на центрите, овозможување на соодветни едукации и слично.
Иницијатива “5 до 12” побара од првите луѓе во Министерствата за здравство и за образование да ги посетат и да се запознаат со проблемите со кои се соочуваат лицата со посебни потреби.