Спасовски: Ако сите работеa како што треба, 27 април немаше да се случи
Објавено во: Македонија 08 Јуни, 2017
Министерот за внатрешни работи Оливер Спасовски на денешната прес конференцијаинформираше за извештајот на работната група во кој има детални случувања од 27 април и случувањата во Собранието кога беа нападнати пратеници.
Истрагата се уште трае, а како што ќе напредува и ќе добива нови информации МВР ќе ги споделува со јавноста.
„Работната група работеше повеќе од еден месец со цел да ја утврди фактичката состојба. Извршен е увид во обемната документација и разговори со голем број членови на МВР и прегледан е материјал, видео материјал од повеќе медиуми. Информацијата е само преработен сепарат од работната група затоа што нивниот извештај е класифициран и не е за понатамошна објава“, рече министерот Спасовски.
Скенирањето на состојбите резултираа со утврдување на формално-правните пропусти, воочување на одредени дисфункционалности на одредени одделенија во МВР со што се јавува потреба за реформи во системот, додаде Спасовски.
Според него, настаните од 27 април потврдиле колку бил во право кога како министер во пржинската влада велел дека МВР треба да се департизира и рефоримира.
„Убеден сум дека МВР има институционален и човечки капацитет за да се справи со посложени ситуации. Очигледно е дека некој ја злоупотребил својата положба а за 27 април мора да има одговорност. Овој извештај потврдува дека заради партизираноста овој орган и министерство падна на испитот на основните свои задачи“, рече Спасовски.
Министерот Спасовски истакна дека МВР мора да го исчисти срамот од инцидентите во Собранието.
Без санкции на одговорните, МВР нема да продолжи да работи професионално, оваа институција мора да се департизира, посочи министерот Спасовски.
Целиот извештај МВР уште денеска ќе го достави до Јавното обвинителство кое понатаму ќе постапува и презема мерки.
Спасовски соопшти дека има суспендирано повеќе лица, околу 23 припадници на МВР по настаните од 27 април, сослушани се 180 полицајци, покренати 45 дисциплински постапки, а истрагата и понатаму трае.
„Еден дел од службите добиле задача да изработа посебен извештај за еден ден, за настаните од 27 април, за да одговара на барањата на нарачателот“, откри Спасовски.