СТИГНАА ПАРИТЕ ЗА „БУСТИРАЊЕ“ НА РАЗВОЈНАТА БАНКА - државата ги исплати 10-те милиони евра, фирмите ги сакаат поволните кредити

Добивај вести на Viber

На Развојната банка и легнаа на сметката 10 милиони евра, пари кои се наменети за докапитализација, а што всушност треба да ја зголеми уште повеќе моќта на банката да кредитира компании во земјава со поволни каматни стпки.

Како што може да се види од платформата Отворени финансии, точно на средината на минатиот месец, односно на 15 ноември, на контото на Развојната банка легнале 620 милиони денари, што е всушност рамно на 10 милиони евра, пари кои се наменети за докапитализацијата.

Како давател на средствата е регистрирано Министерството за финансии, но од одделот Функции на државата, од каде што всушност се задоволуваат сите потреби кои се предвидени со буџетот за нормално функционирање на општеството. Оттаму всушност и биле префрлени парите, односно 620 милиони денари на Развојната банка, со која раководи директорот Кире Наумов.

А, како што веќе пишуваше Фактор непосредно пред тој датум, или поточно на 10 ноември, одлуката за докапитализација на Развојната банка помина и на Надзорниот одбор на банката.

Инаку, одлуката за докапитализација на Развојната банка ја донела Владата на една од своите седници, и ја објавила во Службен весник.

Фактор се интересираше зошто се прави докапитализација на Развојната банка, која е со државен капитал и која е клучна во делењето на поволни кредити за фирмите, а кои главно се обезбедуваат преку донации или повластени кредитни линии доделени за земјава од меѓународни банки и финансиски институции.

Владини упатени извори тогаш објаснија дека на овој начин се сака да се зголеми дополнително капацитетот на банката. Имено, минатата година се изврши докапитализација на банката за три милиони евра, а сега се зголемува за дополнителни 10 милиони.

„Всушност, капацитетот на банката се зголемува во последниве три години, така што нејзината актива порасна на 260 милиони евра“, објасни изворот на Фактор.

Потребата да се докапитализира банката се јавува од причина што расте капацитетот на банката, а се разговара и со други потенцијални кредитори од надвор со цел во земјава да дојдат нови кредитни линии, преку кои потоа би се делеле поволни кредити. Фактот што банката сака да го зголеми кредитирањето и што тоа не би се вклопило во одредени законски лимити на централната банка кои се однесуваат на изложеност, всушност ја наметнува и потребата од докапитализација, со што всушност би се запазиле лимитите од НБМ, објаснуваат нашите извори. Со тоа ќе се зголеми и капацитетот за кредитирање на банката.

Како што е познато, Развојната банка одигра значајна улога за време на ковид кризата во земјава, кога голем број компании кои се соочија со финансиски тешкотии, добија заеми или со бескаматни, или со екстремно поволни каматни стапки, со кои ги премостија ликвидносните проблеми во кои западнаа.

Инаку, според сознанијата, дел од овие 10 милиони евра ќе се искористат да се збогати сегашната кредитна линија која се пласира преку Развојната банка, а со која, како што објаснуваат нашите соговорници, се финансира енергетска ефикасност и обновливи извори на енергија. Според изворите, тие кредити поминуваат одлично, и за нив има голема побарувачка и искористеност.

Можно е овие кредитни линии да се повторат, со оглед на големиот интерес, при што сегашните каматни стапки е тешко да се случат со оглед на општото поскапување на кредитите поради високата инфлација, но во секој случај ќе бидат поповолни од оние што ги даваат комерцијалните банки.

Н.Н.Ф.