Тесла инвестирала 1,5 милијарди во биткоин: Можно ли е наскоро и возилата да се продаваат во криптовалутата?
Објавено во: Економија 08 Февруари, 2021
Тесла објави дека инвестирала 1,5 милијарди долари во крипто валутата биткоин. Компанијата која произведува електрични автомобили утрово го достави својот годишен извештај со што практично стана јасно дека инвестирала во биткоин. Во извештајот стои дека Тесла „ќе започне да прифаќа биткоин како форма на плаќање за нивните производи во блиска иднина“.
Клиентите на Тесла неодамна го повикуваа основачот и извршен директор Елон Маск да прифати биткоин за купување возила. Маск беше гласен за поддршката на крипто валутата на Твитер, дури неодамна додаде и хаштаг биткоин на неговиот профил. Маск, исто така, го поддржуваше Dogecoin на Твитер во текот на изминатата недела.
„Во јануари 2021 година, ја ажуриравме нашата политика за инвестиции за да ни овозможи поголема флексибилност за понатамошно диверзифицирање и максимизирање на приносот од нашата готовина, што не е потребно за одржување на соодветна ликвидност на работењето. Како дел од политиката, може да инвестираме дел од таквите пари во одредени специфицирани средства. После тоа, според оваа политика инвестиравме вкупно 1,5 милијарди долари во биткоин. Покрај тоа, очекуваме да започнеме да прифаќаме биткоин како форма на плаќање за нашите производи во блиска иднина, предмет на важечките закони и првично на ограничена основа, стои во извештајот.