Туск во Скопје - бегалците и кризата во Македонија во фокусот
Објавено во: Македонија 03 Април, 2017
Претседателот на Европскиот совет, Доналд Туск денеска во Скопје ќе се сретне со шефот на државата, Ѓорге Иванов.
Тие на средбата ќе разговараат за политичката криза во Македонија по изборите од 11 декември и заканата од илегалната миграција.
Во 14 часот е закажана средбата на Иванов и Туск, а половина час подоцна ќе се одржи и пленарниот состанок на двете делегации. Во 15 часот предвидено е двајцата да дадат изјави за медиумите.
Доналд Туск трет пат во последните две години доаѓа во официјална посета на Скопје.
За време на балканската турнеја, Туск утрово ќе биде во Словенија, а потоа ќе има средби и со бугарскиот претседател Румен Радев, а задутре ќе биде во Грција на средби со претседателот Прокопис Павлопулос и со премиерот Алексис Ципрас.