Уставен суд повторно го суспендира мораториумот за градење во Општина Центар
Објавено во: Економија 16 Декември, 2020
Уставен суд повторно донесе времена мерка за укинување на мораториумот за градба во Центар, најатрактивната општина за градежните инвеститори. Важноста е се додека Уставен суд не одлучи дали мораториумот е донесен прописно.
Судијата ја прифатија иницијативата за укинување поднесена од двајца граѓани од Охрид, а псоред тоа веќе не важи забраната за градба и важат старите планови и инвеститорите може да бараат дозвола за градба.
„Поведена е постапка бидејќи постојат сомненија дека забраната за градба е донесена во спротивност со Уставот“, соопштуваат од судот.
Според градоначалникот на Општина Центар Саша Богдановиќ, ваквата одлука е мешање во ингеренциите на Општината во Генералниoт урбанистички план (ГУП) и дека мораториумот не е во спротивност со важечките прописи.
„Просторното и урбанистичко планирање е еден долготраен и плански процес кој опфаќа низа дејствија кои сами по себе си се надополнуваат и си противречат во смисла на размена на идеи и плански реализации. Тоа има за цел да обезбеди и заштити сè она што претставува хуман и нормален човечки развој на одреден простор, почитувајќи го јавниот интерес како примарен.”, тврди Богдановиќ.
Еднаш претходно на 20 март Уставниот суд времено го укина мораториумот додека не се донесе одлука дали тој е законски донесен и во согласност со Уставот. Општина Центар потоа донесе нова одлука за мораториум.