(ВИДЕО) „Паднаа“ нови жртви во Венецуела
Објавено во: Свет 22 Февруари, 2019
Нови жртви има на границата меѓу Венецуела и Бразил.
Најмалку двајца луѓе се убиени, а неколку се повредени во судирите на границата меѓу двете држави. Војската на Венецуела пукаше кон цивили кои се обиделе да го спречат затворањето на границата. Ова е наредба на претседателот Николас Мадуро поради спорот со испораката на хуманитарна помош. Мадуро најави дека ќе ги затвори границите за да го спречи влегувањето на помошта.
Од двете страни на мостот што ги поврзува Венецуела и Колумбија, на 300 метри растојание, се одржуваат ривалски концерти. На барање на опозицискиот лидер Хуан Гуаидо, кој се прогласи за претседател, еден од концертите го организира британскиот милијардер Ричард Бренсон. Целта е да се соберат 100 милиони долари за лекови и храна.
Хуманитарна помош веќе почна да пристига на границата со соседните земји Бразил и Колумбија.
Гваидо денеска е на границата со Колумбија, каде заедно со своите приврзаници се обидува да ја ослободи хуманитарната помош, која со денови е „заглавена“ во камионите.
Бразил го отфрлил постоењето на било каков ризик да дојде до судир на границата со Венецуела по објавата на венецуелскиот претседател Николас Мадуро да ја затвори таа граница.
"Бразилската влада засега не идентификувала можност за судир затоа што станува збор за хуманитарна помош", рекол вчера во Бразилија портпаролот на претседателството, Отавио Рего Барос.
Тој додал дека Бразил планира да пружи своја логистичка помош за достава на таа помош за Венецуела во сабота.
фото Ројтерс