Владиниот тим во Мексико, Карлос Слим сака да инвестира во информатичкиот сектор

Добивај вести на Viber

Групацијата на милијардерот Карлос Слим ја разгледува можноста за инвестиции во компјутерската технологија во земјава. Според најавите кои стигнаа од кабинетот на премиерот Никола Груевски, мексиканската групацијата „Карлос Слим“, сериозно ја разгледува можноста за вложување во Македонија. Извршниот директор на групацијата, Карлос Слим Јуниор изјавил дека  неговата бизнис групација веќе ги анализира конкретните детали кои би воделе кон конкретна инвестиција. „Тој ја изрази подготвеноста за идно преминување на нивните одлуки во однос на инвестициите во Македонија во многу понапредни фази. Беше покажан и интерес за разгледување на поволностите за инвестиции и во други економски сектори“, стои во соопштението. На средбата премиерот Никола Груевски ги претстави реформите кои се спроведуваат во нашата земја, како и поволностите кои нашата земја ги нуди на странските инвеститори притоа посебно истакнувајќи ги областите и проектите во кои може да дојде до конкретна меѓусебна соработка помеѓу двете земји, посочувајќи конкретни проекти од областа на информатиката и комуникациската технологија, туризмот, енергетиката, производството и останати економски области. Тој изјави дека е потребно да се потпишат договори за избегнување на двојното оданочување и за заштита на инвестиции за да се зајакне економската соработка. Притоа повеќе од  200 мексикански компании се запознаа со економските потенцијали на Македонија и поволностите што ги нуди на странските инвеститори на бизнис форум во Мексико Сити.  Владиниот тим во моментов е на инвестициско роуд шоу по Американскиот континент.