ВЛАСТА, ГАЗДИТЕ И РАБОТНИЦИТЕ УШТЕ ГИ ПЕГЛААТ СТАВОВИТЕ - како ќе изгледа новото законско решение за недела неработен ден
Објавено во: Економија 16 Декември, 2020
Претставници на власта, работниците и работодавачите кои членуваат во Економско социјалниот совет вчера имале бурна дебата околу законското решение за прогласување на неделата како неработен ден.
Министерството за труд и социјална политика соопшти дека советот вчера имал седница, со која претседавала министеркта Јагода Шахпаска, на која се дискутирало за драфт верзијата на измените на Законот за работни односи, кои предвидуваат денот недела да биде неработен ден.
Оттаму велат дека откако го подготвиле предлог законот, следувала интензивна дебата со работниците, но и со работодавачите.
„Дебатата што се одвиваше изминатиот период навистина беше опсежна и дава значаен придонес во подготовката на конечното законско решение, преку кое ќе се овозможи денот недела да биде неработен ден. Идејата на Владата и на Министерството за труд и социјална политика е да создадат услови поголемиот дел од работниците да можат денот недела да го поминуваат со семејството, како основна клетка на едно функционално општество“, нагласила министерката Шахпаска.
Таа објаснила дека законското решение мора да биде конципирано на тој начин за да обезбеди ефикасно функционирање на системот, при што оние работници кои работат во дејности кои не се неопходни да работат во континуитет, во недела да не работат.
„Во центарот на вниманието нас ни се работниците. Но, исклучоци мора да има и затоа сме претпазливи затоа што не смееме виталните функции на државата да ги ограничиме“, објасни министерката Шахпаска.
Претставниците на работодавачите и на работниците ги изнеле своите ставови околу законското решение, за кое, како што нагласиле, е добро што има широка општествена дебата.
На седницата на ЕСС, иако се членови, не присуствувале претставниците на Сојузот на синдикатите на Македонија (ССМ).