ВМРО-ДПМНЕ: Мерцедесот е во лоша состојба по вина на СДСМ
Објавено во: Македонија 10 Јуни, 2017
ВМРО-ДПМНЕ вината за лошата состојба во која се наоѓа скапиот службен Мерцедес на МВР ја префрли во СДСМ бидејќи тие биле задолжени за негово одржување.
„Токму владиното мнозинство го води Министерството за внатрешни работи скоро цела година и нивна е одговорноста за состојбата во која што се наоѓа возилото. Нивна е одговорноста дали во вакво возило би ги превезувале високите делегации кои би доаѓале во Република Македонија, а кои се обезбедуваат со прв, втор и трет степен безбедносни мерки“, велат од ВМРО-ДПМНЕ.
Денешната прес конференција на Оливер Спасовски покажува дека СДСМ нема ниту идеја, ниту пак некоја реализација со која би се претставил на граѓаните. Доколку СДСМ смета дека мерцедесот е непотребен, може да го продаде. Ваквите возила не губат на вредност доколку се добро одржувани, додаваат од ВМРО-ДПМНЕ.
Опозициската ВМРО-ДПМНЕ исто така наведе долга листа на странски државници кои се превезувале токму во посочениот Мерцедес.