За викендот на повеќе места ќе има пороен дожд, а можно е и невреме со град
Објавено во: Македонија 12 Мај, 2022
Метеорологот Славчо Попоски вели дека за време на викендот во попладневните часови на повеќе места ќе биде нестабилно со пороен дожд, грмежи и засилен ветер. Локално е можна појава на невреме проследено со силен ветер и со појава на град. Што се однесува до температурите, тие и понатаму остануваат високи и максималните дневни ќе се искачуваат во интервалот од 23 до 30 степени, а во најтоплите предели истите се очекува да се искачат и малку над 30 степени. Утре времето во Македонија ќе биде сончево и доста топло со мала до умерена локална облачност и со слаб ветер од променлив правец. Во попладневните часови во планинските предели не се исклучува можноста за појава на локален краткотраен пороен дожд со грмежи. Температурите ќе се искачуваат во интервалот од 24 до 32 степени. И во Скопскиот регион утре времето ќе биде сончево и топло со мала до умерена локална облачност. Ќе дува слаб ветер од променлив правец, додека максималната температура ќе се искачи до околу 29 степени.