За ВМРО-ДПМНЕ договорот со Бугарија е штетен, за СДСМ тоа е исчекор кон иднината

Добивај вести на Viber

ВМРО-ДПМНЕ има политички став дека договорот со Бугарија е штетен и не ги задоволува македонските национални интереси.

Од ВМРО-ДПМНЕ бараат СДСМ да се повлече од договорот за добрососедство со Бугарија. 

Oд партијата повикаа пратениците од владејачката партија да не го поддржат овој договор. 

„Апелираме на совеста на пратениците на Социјалдемократскиот сојуз да не го поддржат овој договор. Не е доцна, вие пратениците од Социјалдемократскиот сојуз имате обврска и кон вашите предци, но и кон вашите деца. Однесувајте се одговорно барем вие, оставете го господинот Зоран Заев сам во овој случај“- изјави генералниот секретар на партијата, Христијан Мицковски.

Од СДСМ сметаат дека ВМРО-ДПМНЕ останува заробена во сопствената политика на поделби, а Македонија го живее новото време на соработка и добрососедство.

„Договорот е во согласност со националните интереси на нашата држава и со интересите на граѓаните на Македонија и на Бугарија. Договорот е основа за пријателство и заемен успех, а неговото потпишување е заеднички успех на сите досегашни влади“- велат од СДСМ.

Тврдат дека е направен значаен исчекор кон иднината и евроатлантските интеграции.