Заев за БТВ: Иванов го крши Уставот, ја штити владејачката гарнитура

Добивај вести на Viber

Иванов го крши Уставот, ја штити владејачката гарнитура и сето тоа го прави за да нема трансфер на власта и да нема одговорност на врхушката на нашите политички опоненти, изјави лидерот на СДСМ, Зоран Заев, во интервју за бугарската телевизија БТВ.

„Јас сум убеден дека со овие чекори што ги преземаме, ќе дојде до доделување на мандатот од Ѓорге Иванов кај нас за да формираме влада и во македонското Собрание да може да ја избереме таа влада“ - вели тој. 

Заев потврди и кажа дека не само што лично тој го осудува пеењето на албанската химна, туку и дека пратениците на СДСМ го осудиле тој чин, седнувајќи во тие моменти.

„Еден од пратениците од партијата БЕСА излезе и ја испеа албанската химна. Тој настан јас лично го осудувам, веднаш тоа го покажавме на дело, сите седнавме кога се пееше таа химна, секако водевме грижа да не се случи немил настан или инцидент помеѓу Македонци и Албанци, заради тоа што во македонското Собрание може да се пее само македонската химна“ – рече Заев.

За обвинувањата дека планира да воведе двојазични банкноти и двојазични ознаки на униформите на АРМ,  Заев рече дека и тој и претседателите на албанските партии потврдиле дека нема да се менува идентитетот.

„Јас сум Македонец, моите родители се Македонци, и иднината на Република Македонија е утврдена согласно со нашите очекувања како граѓани во ова мултиетничко општество во кое што живееме. Досега по сите можни начини и јас и претседателите на албанските партии потврдивме дека нема да се менува идентитетот, дека ќе ја запазиме унитарноста на Република Македонија, дека се што ќе работиме ќе биде согласно Уставот“ - додава Заев. 

Тој вели дека ВМРО-ДПМНЕ бара изговори за да не ја предаде власта.