Захариева oчекува Македонија да почне преговори со ЕУ, иако има 13 годишно доцнење
Објавено во: Балкан 20 Јануари, 2018
Mинистерката за надворешни работи на Бугарија, Екатерина Захариева за „Дарик“ вели дека реално е Македонија да добие покана за почеток на пристапните преговори за членство во Европската унија годинава, покрај напредокот во разговорите за името и планот за реформи.
Таа потсети дека Македонија има статус на кандидат за член на Унијата уште од 2005 година , но политиката на земјата за нерешавање на проблемите со соседите ја довела до 13-годишно задоцнување.
Таа го оцени потпишувањето на договорот за добрососедство со Македонија како настан на 2017-та година.
„Многу Влади работеа на ова прашање и ме радува што конечно заврши. Уште поважно е што овој договор се почитува уште пред да стапи на сила. Лично јас не можев да замислам премиерите на двете земји заедно да застанат пред споменикот на цар Самуил во Софија или пред споменикот на Гоце Делчев во Скопје. Промената на ставот на политичко ниво се чувствува и кај луѓето“- додаде Захариева.
Таа вели дека македонската Влада сфатила дека политиката „против“ не е во склад со европските вредности.