Здружението на информатичко-комуникациските технологии излезе со заклучоци за операторите
Објавено во: Економија 23 Февруари, 2018
На 23.02.2018 година, Здружението на информатичко-комуникациските технологии при Стопанската комора на Македонија одржа седница и расправаше за предложените измени на Законот за аудио и аудиовизуелни медиумски услуги.
По обемната дискусија, членките на Здружението – сите оператори кои вршат реемитување преку различни платформи (ИПТВ, кабелски, ДВБТ и сателитски), ги донесоа следните Заклучоци:
1. Во своето работење операторите работат исклучиво според постојните законски решенија во Република Македонија, за што сведочи фактот дека ниту еден оператор нема никаква пријава за неправилности во работењето од страна на државните органи, задолжени за мониторинг на работењето на операторите. За истото сведочи и постојаниот 24-часовен мониторинг што го врши Агенцијата за аудио и аудиовизуелни медиумски услуги каде не се констатирани прекршувања.
2. Членките на Здружението - операторите ќе настапуваат аргументирано и со факти да се изнајдат реални законски решенија, за што ќе бараaт интензивни контакти во текот на идната недела, со соодветното Министерство и со Агенцијата за аудио и аудиовизуелни медиумски услуги.
По одржувањето на планираните состаноци, членките на Здружението на информатичко-комуникациските технологии при Стопанската комора на Македонија, односно операторите ќе ги објават дефинитивните ставови по однос на предложените измени на Законот за аудио и аудиовизуелни медиумски услуги.