Бугарите бараат македонскиот јазик да не се нарекува македонски, анализира „Вечерњи лист“
Објавено во: Македонија 22 Октомври, 2020
Бугарија го користи членството во ЕУ за негирање на македонскиот идентитет, пишува „Вечерњи лист“.
Откако во март годинава, за време на хрватското претседавање со Унијата доби зелено светло за старт на преговорите за членство во ЕУ, Северна Македонија сега очекува првата меѓувладина конференција да биде одржана до крајот на годинава, со што формално се отвораат првите поглавја од преговарачкиот процес, пишува весникот.
Но, Бугарија се заканува со блокада, додава загрепскиот весник „Вечерњи лист“.
„Меѓу другото, Бугарите бараат македонскиот јазик да не се нарекува македонски, туку исклучиво „официјален јазик на Република Северна Македонија“. Бугарија остава впечаток дека го користи членството во ЕУ за да го негира македонскиот идентитет“, оценува весникот.
„Вечерњи лист“ наведува дека на вчерашниот состанок на Комитетот на постојаните претставници на земјите членки на ЕУ, бугарскиот амбасадор го дистирбиурал „појаснувачкиот меморандум“, во кој, меѓу другото, како што посочува весникот, се тврди дека придавката „македонски“ не означува национален идентитет, туку географско потекло, како и дека Јосип Броз Тито, инспириран од Коминтерната, им наметнал „нов идентитет на луѓето кои претходно се декларирале како Бугари, Србите подоцна сакале да ги идентификуваат како јужни Срби, а Тито ги прогласил за Македонци“.
„Бугарија би можела да се најде под притисок на другите земји членки кои сакаат да го наградат официјално Скопје за макотрпната работа за започнување преговори со ЕУ. Владата на премиерот Зоран Заев се согласи и на промена на името на државата, за да ги отстранат пречките за старт на преговорите, што доажаа од Грција, а пред Договорот со Грција, беше потпишан и Договор за пријателски односи со Бугарија, кој требаше да ги отстрани бугарските пречки. Но, Бугарите продолжуваат да се закануваат со вето“, додава весникот.
Загрепското издание посочува дека дипломатите во Брисел се надеваат дека „се ќе се изглади“ до 10 ноември, кога на заседание на Советот за општи работи на ЕУ треба да биде усвоена одлуката за свикување на првата меѓувладина конференција.
Бугарија го информирала Брисел дека во Македонија се води „антибугарска идеологија“.
Во документот дистрибуиран од Софија до владите на ЕУ, виден од новинар на Политико, Бугарија вели дека она што се случува во Македонија го смета за „антибугарска идеологија спонзорирана од државата“, пишува Политико.