12 граѓани жртви на 34-годишната измамничка „Генерал Мими“

Добивај вести на Viber

Судот и одреди притвор во траење од 30 дена на 34 годишната измамничка „Генерал Мими“ која вчера беше уапсена поради тоа што измамила повеќе македонски граѓани. Против неа се поднесени четири кривични пријави. Жената се претставувала како шефица во НАТО и лажела дека за извесна сума пари од неколку илјади евра, може да среди за вработување во Алијансата. Според првичните информации таа на своите жртви, меѓу кои се споменува и познат скопски бизнисмен, им велела дека посредува македонски фирми да добијат тендери за снабдување на базата во Косово со храна,средства за хигиена или пијалоци. „Засега се поднесени 12 пријави против неа, но се очекува да се зголеми бројот на измамени граѓани, кои по обелоденувањето на случајот, ќе се охрабрат да пријават дека биле оштетени“, соопшти портпаролот на МВР, Иво Котевски. Од јануари до јули годинава со лагата успеала да заработи половина милион денари. Измамата одела до таму што измамените граѓани ги испраќала да се облекуваат во скапи бутици за да бидат претставителни на бизнис средбите кои требало да ги договори. Сепак наместо ова, откако ќе ги земела парите, измамничката ја снемувало. Овој случај стигнал и до помошникот на генералниот секретар на НАТО за политички прашања и безбедносна политика, амбасадорот Дирк Бренгелман. Како што пренесоа повеќе македонски медиуми, тој на состанокот со министерката за внатрешни работи Гордана Јанкуловска минатата недела се распрашувал дали полицијата има информации за измамничката која го злоупотребува името на НАТО. Од МВР најавија дека истрагата продолжува.