Добивај вести на Viber
Предмети со брилијанти и дијаманти, над 2600 златници, девизи, речиси 30 килограми злато, ова е само дел работите кои тежат во приватниот сеф на Јосип Броз Тито, кој неодамна беше отворен. Предметите од таму сега ќе бидат дел од оставинската постапка.
Првиот основен суд во Белград го доби извештајот за направениот попис за имотот на поранешниот претседател на СФРЈ Јосип Броз Тито и го достави до наследниците, а копија добило и семејството на кралот Караѓорѓевиќ.
Пред неколку месеци со присуство на комисија по 30 години беше отворен личниот сеф на Тито.
При пописот се утврдило дека во сефот имало над 29 килограми злато во прав или прачки, 2663 златници, 149 предмети од злато украсени со дијаманти и брилијанти, што биле во сопственост на семејството Караѓорѓевиќ, 1271 монета со нумизматичка вредност, 18 сребрени сервиси, 25 предмети од злато и дијаманти што биле запленети или набавени со државни средства, 26 илјади американски долари, 36 илјади германски марки, дански круни, одликувања од српската династија, медаљони и други лични предмети со помала вредност, објави неодамна Данас.
Сега се очекува да продолжи оставинската постапка на наследството на Тито. Таа почна на барање на покојниот син на Тито Жарко.
Инаку, Јованка Броз, која се наоѓа во тешка здравствена состојба, порано имала поднесено повеќе барања за поделба на имотот. Таа како своја сопственост ги има наведено повеЌе скапоцени предмети: бисери и друг накит, скулптури, слики, вазни, теписи, книги, пет автомобили од гаражата на белиот двор и две од гаражата во Бриони („ролс-ројс“, бел „кадилак“, линколн“...). Јованка вели дека имотот го стекнала во брачна заедница со Тито, а за накитот вели дека го добивала од кумовите и пријателите. Некои од нив ги добивала на подарок од Тито, а за некои навела дека сама ги купувала.
Во трезорот на Тито останал и орденот на Суворов, со милионска вредност, а него го поседувале само Сталин и Жуков. Тука е и каменот од Месечината, подарок од американските астронаути. На списокот на предмети кои треба да се поделат освен златници има и скап мебел, длаборези, антички монети, рубини, порцелански предмети, скапи часовници...