Ако се бара да се утврди што е Гоце Делчев, ќе нема решение, вели Ѓоргиев

Добивај вести на Viber

Нови детали излегуваат од средбата на македонско-бугарската мешовита комисија во Бугарија. Копјата не претстануваат да се кршат околу Гоце Делчев.

Двата члена на македонско-бугарската мешовита комисија ги искажаа своите ставови на заедничко гостување на Бугарската национална телевизија. 

Македонскиот член во комисијата Драги Ѓеоргиев вели дека ако мешовитата македонско-бугарска Комисија за историски прашања продолжи да инсистира во нејзината работа да се утврди и да се напише на документ дека Гоце Делчев бил Бугарин или Македонец, нема да имаме решение. Ова тој го кажа за емисијата „Уште од денот“, на Бугарската национална телевизија.

Според Ѓоргиев, Делчев е многу чувствителна тема, и не е упатно да се одговори дали бил Бугарин или Македонец.

„Не е работата на комисијата да каже. Ќе дискутираме. Ама ако оваа комисија продолжи да инсистира и да напише документ дека Гоце Делчев бил Бугарин или Македонец, решение нема да има. Ние не зборуваме за еден црно-бел свет во тоа време, тоа е испреплетено, сите случувања се по малку и хаотични“, рече Ѓорѓиев.  

А од бугарската страна не мислат така. Ангел Димитров, бугарскиот член на комисијата, вели дека се разбира дека тоа треба да се каже. 

„Ако не се знае што е човекот не можеме да го оцениме точно неговото дело. Не треба ние да кажеме што е Гоце Делчев. Тој кажал сам што е, кажало неговото семејство, неговите другари, соборци, учесници во борбата, луѓето“, рече Димитров.

Нашиот член, пак, реплицираше дека ако се оди по аналогија дека Делчев сам кажал дека е Бугарин, тој многу често го употребува наративот македонски народ и Македонци. 

На емисијата и Ѓеоргиев и Димитров, рекоа дека прашањето за евентуално заедничко чествување на Гоце Делчев е тема на денешната средба на членовите Комисијата, откако во текот на вчерашниот ден тие расправале за средновековната историја и периодот на Османлиската Империја, како и за учебниците по историја. И за ова прашање нема напредок.