БЕСА ТРАНС ВО 2018 ГОДИНА ПОБАРАЛА И ДОБИЛА ЛИЦЕНЦА - од Транспорт велат дека ги исполниле сите услови за меѓународен превоз на патници

Добивај вести на Viber

Беса Транс во јули 2018 година доставила барање за добивање лиценца од Министерството за транспорт и врски. Притоа ја доставиле и целокупната документација, со што ги исполниле условите за да ја добијат лиценцата за меѓународен превоз на патници, по што од Министерството за транспорт во август му ја издале дозволата.

„До Министерството за транспорт и врски, Сектор за патен сообраќај, поднесено е барање од страна на превозникот Беса Транс БТБ од Скопје, ул. 1 бр. 1, Рашче, Скопје, евидентирано под број 08-4127/1 од 18.07.2018 година, за добивање на лиценца за вршење на меѓународен слободен превоз на патници.

Кон барањето е доставена целокупната документација согласно член 8 од Законот за превоз во патниот сообраќај, со што превозникот ги исполнил условите предвидени во Законот и му е издадена лиценца за вршење на меѓународен слободен превоз на патници.

Со барањето за добивање на лиценца за вршење на меѓународен слободен превоз на патници, превозникот ги исполнил условите за добивање на лиценца и издадена му е лиценца за вршење на меѓународен слободен превоз на патници со сериски број 007017 со важност од 08.08.2018 година до 08.08.2022 година“, се вели во соопштениетоп од Министерството за транспорт.

Натаму, објаснуваат од овој ресор, од тој момент превозникот се нема обратено до Министерството за транспорт и врски, Сектор за патен сообраќај, со поднесено барање за добивање на извод од лиценца за ново набавено возило.

„Очекуваме истрагата да ги покаже причините поради кои настана трагичната несреќа.

Министерството за транспорт и врски останува отворено за соработка со сите надлежни домашни и меѓународни институции за целосно расчистување на случајот.

Изразуваме најдлабоко сочуство до семејствата на загинатите патници во несреќата во Република Бугарија, во која животот го загубија државјани на Република Северна Македонија, и им посакуваме брзо опоравување на повредените патници“, се вели во соопштението.