БЕЗОБРАЗЕН ТРАМП: Илегалните имигранти се „животни и садистички криминалци“
Објавено во: Свет 17 Мај, 2018
Претседателот на САД, Доналд Трамп, којшто речиси никогаш не се труди да одбере убави зборови, ги нарече животни, илегалните имигранти во Калифорнија.
Оваа изјава беше кажана на тркалезната маса за градовите во САД кои им даваат засолниште на имигрантите.
„Ги протеруваме луѓето од земјата. Не можете да поверувате колку овие луѓе се лоши“, рече синоќа Трамп за време на разговорите за градовите во Калифорнија кои одбиваат да соработуваат со имиграциската служба на федерално ниво.
„Тие не се луѓе, тие се животни. Ги протеруваме од земјата со брзина која досега не сме ја имале“, рече американскиот претседател, додавајќи дека законот во Калифорнија им нуди засолниште на „опасни престапници кои се едни од најнасилните во светот, како што се членовите на групата МС- 13 криминалните банди од Салвадор.“
Трамп додаде дека „невини мажи, жени и деца се на милост и немилост на садистички криминалци“.
Неговата изјава предизвика жестоки реакции на демократите кои рекоа дека имигрантите се човечки суштества.
„Тие не се животни, не се криминалци, не се шверцери на дрога, не се силувачи. Тие се човечки суштества“, рече демократскиот пратеник Џаред Полис од американската сојузна држава Колорадо.